اجراءات صرف تعويض حادث سياره مجهولة

الأجراء او التصرف القانونى لو حصلت لك – لاقدرالله - حادثة او اصابة عربية 

مش عارف العربية اللى عملت الحادثة او ملحقتش تاخد رقمها... ؟
هتتصرف ازاى...؟
وهتعمل اي....؟
الحل هنا حاجه اسمها الصندوق الحكومي لتغطية تعويض حوادث الطرق ودة بيغطى حالات كتير منها الحاله اللى بنتكلم عليها وهي :-

1-انك مش عارف العربية اللى عملت الحادثة.
2-ان العربية اللى عملت الحادثة رغم انك عرفتها  مش متأمن عليها .
3-انك عارف العربية والعربية متأمن عليها لكن شركه التأمين فلست.
4-في حالات تانية بيصدر بها قرار من الهيئة المصرية للرقابة علي التأمين.
ونرجع بقي للصندوق اللى بنتكلم عليه دة ودة بيصرف في حالة الوفاة – لاقدر الله – او العجز الكلي المستديم ( اربعين الف جنيه) ولو مفيش وفاة او عجز كلي بيصرف نسبة من الاربعين الف.
*اما بقي لو في اضرار في الممتلكات فالصندوق بيصرف عشرة الاف جنية .
والسؤال المهم هنا..؟
ازاى تقدم علشان تاخد مبلغ التعويض؟

اول حاجه لازم نبلغ الصندوق بالحادث خلال (15) يوم من تاريخ الحادثة.
ودة مهم جدا علشان لو بعد كدة مينفعشي ويتم الصرف خلال شهر من تاريخ تقديم طلب المستندات .
واى بقي الاوراق المطلوبة...؟
1-صورة التوكيل او سند الوكالة وبطاقة للرقم القومي
2-وتقديم الطلب او الصرف
3 – ولو العربية عرفناها لازم يكون في شهادة بيانات الترخيص ووثيقة التأمين وفي حاله الوفاة او العجز الكلي يقدم طلب او صورة رسمية من شهادة الوفاة والاعلام الشرعي
4- التقرير الطبي وصورة من محضر التحقيق
5- صورة من قرار النيابة العامه والفواتير في حاله العجز الكلي او الجزئ
اما بقي لو في مشكله في الممتلكات :-
لازم نجيب صورة رسمية من المحضر والطلب وصورة من قرار النيابة وتقرير الخبير للمعاينه لتقدير قيمه الاضرار
((خلي بالك))
في حاجه اسمها مدة التقادم يعني مفيش صرف او طلب للصندوق بالتعويض وهي ثلاثة سنين من تاريخ الحادث .
وفي الاخر عنوان صندوق الحكومي لتغطية تعويضات الطرق هو
((10 شارع الالفي بالقاهرة ))